A Asociación Pura Raza Cabalo Galego segue incluíndo animais que non pertencen á raza nos seus concursos. É certo que a Xunta sacoulle á oficialidade aos seus certames, mais así non cremos que a recuperen. Tanto en Padrón coma en Noia, nas dúas primeiras probas puntuables para o dito campionato, admitiron dúas eguas sen pasaporte de pureza racial. Pode que sexa pola escaseza de cabalos que se veñen presentando aos seus concursos xa que só dous, como moito tres, criadores seguen de forma continuada esta competición.
Dende que esta asociación botou a andar estes concursos, o descenso do
número de participantes foi a pique e non por motivo da crise económica.
De 9 ou 10 criadores que se presentaban aló polo ano 2005, pasouse a 2.
Asemade, segue presentando cabalos da propia asociación e levando premios de forma inxusta. É certo que capou a un bo número de exemplares e agora só presenta un pero no concurso de Noia incluso premiou un cabalo co rabo abrancazado cando o prototipo racial di claramente que as despigmentacións de capa penalizan ou incluso son motivo de total exclusión na raza. Na entrega de premios, o premio foi recollido cun cabalo totalmente distinto e xa non se notou o problema.
Por outra banda, fai exhibicións de doma con dous cabalos que teñen o rabo medio branco. Por favor, aínda que estean castrados e non crien con eles, que llelos corten.
Xa que logo, cremos que esta situación de "abuso de poder" ou de "promocionar unha raza de forma fraudulenta e a calquera prezo" debería de ser tida en conta polas administracións que subvencionan toda esta falsa parafernalia que, no canto de fomentar, desvirtúa todo o traballo serio que se pode facer.
Por último, botamos en falta que a Asociación de Criadores de Cabalos de Pura Raza Galega (Puraga), que é a
única entidade recoñecida oficialmente como xestora do Libro de Rexistro Xenealóxico para o Cabalo de Pura Raza Galega, non tome cartas no asunto e denuncie ou xestione esta situación.
